СтIал Сулейманан райондин Хтунрин хуьр Шихидхуьруьн администрациядик акатзава. Ам Кьасумхуьруьвай 11 километрдин кьиблепата авай мулкарал экIя хьанва.

Малум тирвал, «хтун» гафунихъ халкьдин гегьенш къатариз чидай кьве мана ава. Са манада глагол жезва, кьвед лагьай мана «хват» (тарцин емиш) гафуниз талукь я. Пешекарри хуьруьн тIвар кьвед лагьай манадихъ (яни емишдихъ) галаз алакъалу ийизва. Гьа са вахтунда инал чи фикирдиз емишрин, набататрин тIварар алай Чуьхверхуьр, Пиперхуьр хквезва.

Хтунрин хуьр арадал атай вахт малум туш. Агьалияр хуьруьн майишатдал, кьилди къачуртIа, гьайванар хуьнал машгъул жезвай.

1886-йисан переписдин делилралди, Хтунрин хуьре 57 майишат, 253 агьали (126 итим ва 127 дишегьли) авай.

Чи йикъара хуьре 138 кIвал ава. Агьалийрин кьадар 492 касдикай ибарат я.

Мурад Мегьамедкеримован «СтIал Сулейманан район: ­тарихдин гелерай» ктабдай.